قصيدة الحب

قصيدة الحب 
كلمات و وأداء الشاعر عبدالله حسن
حرفين ما بينهم فيه قلوب اتجمعت
وقلوب كتيره اتمتعت
وقلوب ما بين الـ "ح" و"ب" كتير اتمرجحت
حرفين وفى علم اللغه متجمعين
وكانهم حبيبين
مبيقبلوش لو حرف تالت جه دخل
جرب كده لو قولنا "ر" هتبقى حرب
لو قولنا " ج " هتبقى حجب
لو قلنا ايه لو قلنا ايه
الحب مش ملك قلوب الاغنيا
حب الفقير زيك يا بيه
الحب مش محتاج فلوس 

و لا يعترف بالأصل لا و لا بالنسب
الحب فى حياتنا نسب
و إحنا ساعات بنجنبه و نتجنبه
أو نحصره فى قلب مرسوم على الشجر
أو فضفضة لوش القمر
با عاشقيين اتجمعوا
الحب أصبح فى خطر
و البعد عنه مش بطولة 
غمض عينيك .. كده و افتكر أيام زمان
فاكر زمان ...
حب الطفولة
حب المدارس و انتظار بنت الجيران
لما كان النية حاضرة
ارتباكك فى السلام
لما سألت صاحبتك امتى المحاضرة
وقفتك على سلم الجامعة القديم
دندنة زى الهوا لعبد الحليم
وقفتك بالساعة تستنى
"أول مرة تحب يا قلبى و أول يوم أتهنى"
و تاخدنا السنين لفة
دموع الفرحة فى الزفة
ما بين بدلة و بين فستان

و دووم تاتاتك
و لا أملك سوى حبى
و خالى من العذاب و الشك
يا ناس...
يا ناس الحب ده نعمة
عيون بتشوف و من غيرها أكون أعمى
فبالحب ابتدى العالم
ومن حوا ومن ادم
مرورا قيس مع ليلى
ومن عنتر الى عبله
ومن رميو الى جوليت

ومش شرط انه يبقى يا ناس
علاقه بين راجل او ست
فحب بكل ما تملك
بلادى انت مشيت فيها
وبيت انت فى قلبه كبرت
وحب لنفسك الاحسن
وحب الدنيا شرق وغرب
ولو جربت الف طريق ومنفعتش
جرب تحب